مؤامرة كــُــرَويـّه

بالله شبيه كل ما يقرب الموسم على نهايتو و تقوى المنافسة على اللقب ، و بعد ما نبداو نفرحو و نشمّو في ريحة تعددية و اختلاف الوان في الكورة عالاقل ، و يوفى عصر الحزب الوا ... أأا .. لا .. لا.. نقصد عصر الفريق الواحد، اللي يحب يكون مهيمن و مسيطر من البداية للنهاية و بكل الاساليب ، شرعية و لا شرعية ، يطلع لنا رئيس جمعية بتصريح غريب ، مبطّن ، مثل تصريح السيد بادين التلمساني البارح ، اللي يحب يرجع بينا لنظرية "المؤامرة" والاستهداف ، و كان تتذكّرو ، و في نفس الفترة من الموسم الفارط ، طلع لنا سي معز ادريس و يحكي بنفس اللغة لغة الاستهداف و المؤامرة
بربّي آنا مؤامرة ؟ و شكون يتآمر و الا يستهدف في اشكون ؟؟ و هوما يعرفو اللي تأثيرهم في الرأي العام اكثر و اسهل من خطاب طويل متاع شخصية سياسية .
يزّينا من التصريحات الاعتباطية و اللامسؤولة رانا ماناش ناقصين شوشرات ديماغوجية ، و خلّينا نلعبو الكورة للكورة بدون اصطناع مؤامرات و معارك وهمية ، واللي يتخاذل يتحمّل مسؤوليتو ، و ما يلقيهاش على متآمرين من صنع خيالو و اللي يربح صحّه ليه

الى عاشور الناجي

انا الجنّي .. مدوّن بسيط .. مانيش اكاديمي و مانيش مختصّ في السياسة .. و هاذا ما يمنعنيش من الادلاء بآرائي طالما اني التزم الاحترام و اطالب به
حبيت نسوق جملة من الملاحظات الى المدوّن عاشور الناجي اللي عندي مدة نتابع فيه . لكن ما نجّمتش نحطّو في خانه معينه ، موش خانة متاع تصنيف سلبي و طوابير .. لا .. ابدا .. اما حبيت نعرف انت شكون ؟ و انت وين من قضايانا

على خاطر انا عرفت مدونين اسلاميين .. واضحين .. و يساريين .. و عروبيين .. ليبراليين .. و مستقلين لكنّهم يشتركو مع هاذا و الا هاذاكه في بعض النقاط

كل المدونين تقريبا يكتبو في مختلف المواضيع

كل المدوّنين كيما يطّرّقوا لفلسطين و الحرب ..يطّرقوا زادا لقضايانا الوطنية .. و ينقدو و يعبّروا على استياءهم من السياسات و البرامج المتبعة

الا انت .. فقط هاو فاش لاحظتك تحبّ تحكي ، و بشكل مطّرد ياسر و منتظم وكثيف

انا لاحظت انك في اغلب تدويناتك يا إمّا تبرّإ في إسرائيل من الجرايم ، سواء ارتكبتها: اعتداءات غزة ، أو لم ترتكبها .. هي او اسلافها "اليهود" : مقتل الحسين.. رغم انّا ما نّجّموش نجزمو بذلك
و في المقابل لاحظت انّك هالتبريء اللي انت تمارس فيه ديمه لاسرائيل ديمه ترفقو بتضخيم ليها و بتلميع و تثمين لديمقراطيتها و حداثتها و تفوّقها .. في حين انها اسوأ نموذج متاع تطرف و تعصّب
لاحظت كذلك انّو هالتمجيد اللي ديمه يشعّ من تدويناتك لاسرائيل يكون زادا مرفق بتقزيم و تشويه و سخرية من أيّة حركة مقاومه ، او تضامن مع هالمقاومة

ياخي ، و سامحني على صيغة السؤال التحقيقية شويّه هههه انت شكون ؟؟ انت شنوّة ؟؟؟

لا ... لا ... للتصنيف ، لا .. لا .. للتصنيف

بعض ملاحظات حول التصنيف ، و اسمحولي اذا كنت متأخّر خاطر الظروف ماهيش سامحتلي انّي نكون كونّكتي كل يوم

انا كي نفحت في ميدان التدوين .. شفت فيه هامش متاع تعبير حرّ .. تلقائي .. حبيت نهرب من الحاجات اللي تمارس فيهم السلطة عالعباد اللي عندهم تفكير موش كيفها هيّ .. و اللي يعرف مدوّنتي لولى ، اللي حجبها عمّار بعد ما صنّفها ما نعرفش على آنا اساس ، يفهم مليح انّي حبيت نفضفض .. باش نرتاح شويّ من حاجات تبكبك لداخل ، و كي نقولها نتعرّض للاحكام المسبقه .. و جيت هارب من العباد اللي تصنّف فيّ ، ياخي لقيت ما اكثر ، خاصة المدة الخّره ، تصنيف المدونات الى غبية و حمقاء ، شيء مؤسف ، ياخي انت شكون باش تصنّف العباد ، شنيّ مشروعيتك ؟ شنيّ احقّيتك ؟ عندك مفتاحخ سحري متاع الذّكاء باش تصنّف هاذا غبي و هاذا لا ؟؟ تقلّي هاو ثمّه شكون يطلق على الفكر المقابل ليه صفة الغباء ، و هاو ثمّة حتّى شكون مسمّي مدوّنتو لا للغباء ، معقول لكن ثمّة فرق بين نعت "فكر" بالغباء و بين نعت "شخص" بالغباء دون احترام لكرامتو الانسانية ، وشخص هنا يعني مدوّن

مّاله انا انّجم نعمل ليسته في المدوّنات النّسا ، و نحطّهم تحت عنوان "مدونات ناقصات عقل و دين" ؟؟ مادام كل واحد حرّ في اختيار المقياس اللي يريّحو
و تحتها ليسته اخرى متاع "مدوّنون سوكارجية" و تحتها ليسته متاع " مدوّنون زنادقة" و تحتها"مدونون مشعوذون" و تحتها" مدونون سمان" و تحتها "مدوّنون طوال" و تحتها مدوّنون ضعاف" و الليستات ما توفاش

ياخي و انت مصنّفني بالشكل هاذاكه ، مازالش يجي منّو نجيك و نزورك و انّاقشك و انعلّق عندك ؟؟؟ اكيد لا ، لانّك سايّي حكمت عليّ مسبقا ، يعني هاذا باب متاع حوار سكّرناه بها التصنيف السلبي هاذا

عيب !!! و الله عيب

راهو كل مدوّن عندو مدوّنين يكرههم ، يقوم يصنّفهم هكّه ؟؟؟؟؟ !!!!!؟؟؟؟؟

نفرضو كل مدوّن يعمل هكّه ، لاش نوصلو فلــّـخـّـر ؟؟ نوصلو باش كل مدوّن يكتب تدوينه يعلّق عليها هوّ و يمشي يرقد ، مادام اللي ممكن يتفاعلو معاه ، مقاطعينو خاطر مصنّفهم ، و الا مصنّف اصحابهم ، اللي هوما مصنّفين اصحاب اللي موش مصنّف اللي مصنّفهم هوّ، على اساس انّهم يتصنّفو ، لكن تصنيفو ليهم ماكانش كيما التصنيف اللي صنّفوه بيه اللي مصنّفينو قبل ما يصنّفهم هوّ

ريتو مخيبها الحكايه ؟؟؟ هههههه

لا ، و خاصة انّو العديد من اللي تمّ تصنيفهم هوما طاقات محترمه ، سواء من الليستة الفوقانية و الا اللوطانية ، و كيما طارق الكحلاوي مدونتو محترمة و مواكبة و مطّلعه رغم انّو يصعّبها علينا مرّات هههه (نمزح) والا براستوس الفنان صاحب المدونه الطريفة ، و فري راس اللي يقعد يقعد و يبعثلنا نقشه مختصرة وحلوّة ، و قصّة اونلاين اللي لمّها أدب و قصة قصيرة و سنما و تاريخ القضية الفلسطينية.. ارابيكا .. و لادة ..و غيرهم من الاصدقاء

كيما هاذوما ، كيما زاده ازواو اللي مدوّنتو ما تنجّم كان تجلبلو الاحترام ، و هي مدونه متعددة الاهتمامات ، و غنية و ثريّة ، و الا عياش اللي تدويناتو انا واحد من الناس نستفيد منها في مختلف المجالات : فلسفة ، علوم ، فنون ... مانيش بالضرورة موافقو على كل أفكارو الكلّ ، اما ما ننكرش انّو يضيف لكل من يقرالو ، و الا بيغ صاحب الاسلوب المتميّز

انا تبّعت حتّى ردود الفعل ، صحيح كانت متشنّجة و منفعلة لدرجة البذاءة ، و هاذا زاده مؤسف جدا ، لكن ّ من الشرعي انّو اللي يستفزّوه في شخصو ، مآلو يردّ الفعل

و نستغرب اللي يستنكرو البذاءه ، و نرى اللي ما عندهمش الحق في هالاستنكار ، على خاطر هكّاكه عاد كل حدّ و طريقتو