بـوبــــاله...Poubelle

تي معانا و الا معاهم

2009-09-07T06:20:00.000-07:00

براس الحنيّنه فهّموني

توّ هاذا مع شكون

مرّه يعطيهم صوتو

و مرّه يتمقعر عليهم
و عيد ميلاد سعيد وكاذا

و فوق من هاذا صنصرلي تعليقي برغم هو تعليق نظيف

كلندو + عمار = كـَـلـَـــمار

يا جماعة الطابور:شبيكنّ بلعتنّ سكّينتكنّ بدمّها عاد ؟

2009-08-28T03:13:00.000-07:00

مشى فيبالي بعد ما وضّحت لكنّ اللي انا موجود موش كيما تجرّأتنّ انتنّ و نفيتنّ عليّ حقيقة وجودي ،و قلت تو تعتذرن على افترائكنّ عليّ ، ياخي انتنّ بلعتنّ سكينتكنّ بدمكنّ و سكتّــنّ و كانّ شيئنّ لم يحصل اليكنّ . راهو ماهوش عيب اذا انتنّ غلطتنّ و هلوستنّ و قذفتنّ و افتريتنّ و كذبتنّ و تجسّسّتنّ على كيفية رسم الهمزةو ادّعيتنّ و خلوضتنّ يلزم من بعد تعتذرن على ما اقترفتنّ من افتراءات و تهم بالباطل
الدّنيا راهي ماهيش مسيّبه كيما تصوّرتنّ و كيما زيّن لعقولكنّ اصدقاءكنّ و يلزمكنّ تتحملنّ مسؤوليّتكنّ
ماذا قلتنّ
ههههههههههه

جماعة قناة حنبعل سرّاقــــين هههههههه

2009-08-26T00:22:00.000-07:00

ياناس ، يا عالم ، يا هوووووه ، يا مدونييييين ، قناة حنبعل يسرقولنا في افكارنا من المدونات
ردّو بالكم
انا باش نشكي بيها على خاطر سرقتلي فكرة برنامجها لي تعدّي فيه توّ وقت شقّان الفطر "تونس2050"

هاك اللي يحكيو فيه كيفاش زعمه زعمه عام الفين و خمسين باش تولّي الاوملات ماكله زمنيّة ، و الفيفا مشروب شيّاب كيما التاي لحمر توّه الى اخره ، خاطر انا مولى الفكرة الاصلية بدليل انّي كنت حكيت على حاجة كيف هكّه في مدوّنتي القديمه المحجوبه هنا ياخي ما لقاو كان واحد بوهالي و زوّالي كيفي يسرقوه ؟؟؟ ههههه ؟؟؟ ملّا حاله و ملّا ، واحد قالّك انت ماكش موجود في هالدّنيا هاذي فرد المرّه ، و لخرين قناة بطمّ طميمها تسرقلي في افكاري

ايّ شاهية طيبه

يمشيش يجد عليكم و تعملولي منها طاوله و كراسي هههه راني نفدلك

الجنّي متّهم بأنــّو موش موجود ... هههههه

2009-08-25T00:53:00.000-07:00

قبل كل شي رمضانكم مبروك و انشالّه كل عام و انتوما حيين بخير

انا هو الجّنّي ، كنت نمرّ بظروف صحّية صعبة و توّه كي تماثلت للشفاء عملت طلة عالبلوقسفير و اكثر حاجة فاجئتني هي انّي متهم بانّي مانيش آنا .

ههههه

تصوّرو واحد متّهم بالسرقه مثلا ، و لاخر بالقتل ، و واحد بالخيانة الوطنية .. بينما انا موجّهتلي تهمة انّي : مانيش موجود

يظهرلي نستحقّ ندخل عليها كتاب غيناس الفازة

ايّ نبداو

ياخي فيبالكم اللي الجنّي هو مولى المدونه المحجوبه هاذي ؟

الجنّي اللي كيما ظاهر من عنوان مدوّنتو لولى

(roufrouf)

و كيما ظاهر من عنوانو الالكتروني

raouf1942@yahoo.fr

اللي إسمو : رؤوف

الجنّي اللي هو مؤمن بربّي و بالنّبي و مسلم يقول لا اله الا الله محمد رسول الله كيما تشوفو هنا

و الا في بعض التعاليق هنا اللي يتضرّع بالدعاء مع احد المعلّقين لنصرة الفلسطينيين في غزة

الجّني اللي متزوّج منذ التاريخ اللي موجود في التدوينه ، و شوفو خونا براستوس متزوج في اوت الفارط

الجّنّي اللي ما يفهمش في التقنيات ، مثلا : مايعرفش اش معناها :

verification des mots

و ما يعرفش ينشر موسيقى هنا

الجني اللي يكتب في الكورة اكثر من مرّة ، مثلا هنا

بينما خونا البراستوس كعبه لا في الكورة بشهادتو هوّ هنا

الجّني اللي مدوّنتو الاولى تتضمّن في قايمة اصدقاؤو ناس لا يمكن لبراستوس انّو يصاحبهم كيما الكلندو ، عمروش ، فرفر ، ههههه ، تعرفوه فرفر ؟؟

!!!!!

يقول القايل اش مدخّل هاذا الكل ، و اش يهمّنا فيك و قتاش تزوّجت ، و تدخّن و الا لا ، نجاوبك و نقولّك : باش تعرف جنّي شكون و تحكم عليه موجود و الا شخصية خيالية ، يلزمك تعرف النشأه متاعو ـ و اللي لا غبار عليها خاطرها موقثّقة بالتواريخ و مافيهاش لعب

و اكثر من هاذا ، تتضمّن الف دليل على انّي انا = انا ، و مانيش حدّ آخر، براستوس و الا كرموس

انا اكثر ما ضحّكني في الفازة انّهم الناس اللي أصابتهم التهلويسه هاذي و عداو بيها بعضهم للاسف ، كانو اغبياء بصراحه ، في اختيارهم للمدوّن اللي ظهرّلهم انّي انّجدم نكون انا هو وهو انا ، و اللي هو براستوس

عاد ما لقيتو كان هاذاكه ،؟؟؟

اول انطباع خذيتو على براستوس هو انّو وقت اللي يحبّ يقول كلامو ، يقولو بوضوح ، و يتوجّه بيه مباشرة للي حاجتو بيه ، مما ينفي التجاؤو للتخفي وراء مدوّنه وهمية.

انا مانيش مطالب باش نحطّلكم نسخة من بطاقة تعريفي الوطنيه رغم انّو ايميلي على ذمّة كل واحد اصابو التهلويس بأنّي انا شخصية وهمية من خلق مدوّن آخر ، و مستعدّ نستقبل ايّ فريق تفتيش ، يجي ، و من غير سابق إعلام ، و يعملّي زيارة فجئية باش يتأكّد من انّي انا كائن بشري ، بلحمي بدمّي ، و الحكايات اللي حكيتهم في مدوّنتي الاولى

على إصابتي بإعاقه بصرية منذ الصغر

و على تراخي عايلتي في علاجي

و على انّو الصدّمه هاذي بقدر ما أثّرت فيّ بقدر ما صنعتني و خلقت فيّ قوّة داخلية

قلت و مانزيدش نعاود ، اللي يحبّ يجي بحذايا انا نفرح بيه

و نعرّفو بالوالد متاعي ، و تو هو يحكيلو على تراخيه في علاجي ، الشي اللي كنت حكيت عليه هنا

و نهزّو للوالده متاعي ، و تو تحكيلو هيّ بفمّها على اللي كنت حكيتو هنا ، الحمدولّه يا ربّــي كل شي موثق بالتواريخ.

و نهزّو للدار اللي كنت ساكن فيها و كيفاش هي فعلا مقابله لجنة التنسيق و مركز الشرطه و اللي حكيت عليها هنا . و نورّيه عقد الكراء

ههههه

يعني ، من غير لفّ و دوران ، انا مسؤول كل المسؤولية على الكلام هاذا، اللي يجي مرحبا بيه ، غير يراسلني عالايميل ، و كانو قريب ، يا حبّذا ، و كانو بعيد، نخلّصلو الركوب ، مـَشــْـي و جـَـي ، و نعشّيه و نبيّتو ، انا راني ولد ريف ، يعني المشوي و الرايب و العظم العربي و الطابونه، الكل يخرجولو على خناخشو، بالشفا و الهنا.

بالطبيعه ، فريق التفتيش اللي باش يجي ، باش يلقى عندي كل الوثايق اللازمه : عقد زواجي ، بطاقة تعريفي الوطنية الخ ...الخ

شنيّ بقى ؟؟؟ بقى انّو كتيبتي كيما كتيبة براستوس ؟؟ نفس الحروف ؟؟ نكتبو الهمزة بنفس الطريقه ؟؟؟

هاذا اللي بيكم ؟؟؟

هههههههه

ياخي انا نكتب من أصلو و الا نقرا من أصلو ؟؟؟

جاب ربّي في الحوار هاذا

بيني و بين برباش ، وضّحت اللي انا ما نكتبش عالكلافيي ، و اللي عندي شكون يكتبلي و شكون يقرالي

ماو قلنا ظروف إعاقتي البصرية ما تسمحليش باش نعمل هاذا الكل ، اش معناها هاذا ؟؟ معناها عندي شكون يقرالي ، و شكون يكتبلي ،و شكون يأثّثلي مدوّنتي ، و شكون يعلمني اش فمّه و اش ما فمّاش .

تي انا كل يوم نخلّص قهوة الصباح و كاس تاي لعشية للشاوش متاع ادارتنا باش يقرالي الجرايد ، ايه شبيه ، ياخي باش يفوتني طه حسين ؟؟ هههه، اهوكه عمل سوزان باش تقرالو و تكتبلو، و من بعد بزنسها ، و خذاها ، ههههه

أصـيع آنا بآى .. ؟؟ هههه ، كيما قال عادل امام.

فمّه شكون يقلّي راهو فمّه مدونين جدد باهين نحبّك تعرفهم يلزمك تواكبهم ، و يقرالي

فمّه شكون يعلمني بالحملات التدوينية الجماعية ،1 جويليه ، 25 ديسمبر ، 4 نوفمبر، و غيرهم

نفس المتعه اللي تلقاوها انتوما في التدوين و في الكتيبه و في تخريج مكنوناتكم ،نلقاها انا زاده راو ، اما بالسّمع

ميسالش ماو ؟؟؟ ، و الا موش من حقّي ؟

و ماذابيكم ما تفهموش الحكاية اللي انا منتدب واحد بعينو باش يقرالي و يكتبلي ، لا ، موش واحد اكاهو ،ايّ فرصه نلقاها ، و خاصة مع الفرصه يكون فمّه واحد عندو بال واسع ، نعطيه الرابط متع مدوّنتي اللي انا حافظو ، و نبدا من غادي نقلّو اعمل و اعمل ،اكتب و اكتب

تقول انت : شكونو هاللي يقرالك و شكون يكتبلك ؟

و هنا بالظّبط وين نقولّك انا : حدّك غادي،التّبوليس لا ، تكتبلي مرتي ، و الا خويا ، و الا براستوس ،و الا شمعون بيريز ،و الا كل مرة يكتبلي واحد ،و الا كاتب عمومي و الا خصوصي ،هاذيكه أوموري ، و حتى حدّ لا من حقّو يدّخّل فيها .

ينجّم يكون الي يكتبلي خويا ، صاحبي، ينجّم يكون واحد يكتبلي تدوينتي في الوورد و يعطيهالي في ديسكات و انا نمشي نبوستيها كيما هي من بوبلينات و الا من اي بلاصه فيها انترنات

كل شي وارد باعتبار حالتي البصرية الخاصة

الله غالب ، كسّرتلكم روسكم بالجزئيات ، اما اللازم لازم ، باش هالفروخ الجدد اللي تعلّمو يتكلّمو في الفارغ ، يتعلّمو الحديث بالمليان

و توّ باش نحكيلكم على الظروف اللي تمّت فيها التهلويسه متاع العمروش ،و اللي تبّعو فيها الكلندو ، اللي على فكرة ، تصدمت فيه ، خاطرو ظهر تبّاع ياسر .

هو ما يطلعش بالطلالع،اما فيسع ما يتبّع اللي يطلعو بالطلالع ، و يبدا يضحك اكثر منهم

عمروش قال راهو جنّي مدوّن وهمي ،جا حتّى هوّ يعاود فيها ، ويضحك

و من بعد قتلو انا لا ، راني فعلا انا هو صاحب التعليق اما حذفتو بعد ما نشرتو خاطر ريت فيه نوع من صبّان الزيت على النار،كيف كيف سي الكلندو تبّعني و قالّي : اعتبرني ما قلت شي ،هكّه و الا لا كلندو ؟

الطّمبرو قال راهو براستوس بيدوفبل، جا حتّى هو يعاود فيها ،و يضحك

قصة اون لاين قال راهو عاشور مسيحي ، جا حتّى هو يعاود فيها ،و يضحك

نحبّ نوجّهلو طلب ،انّو يكبر شويّه ، و يعود يتروّى قبل ما يبدا يروّج في كلام ما ثماش اتفاق على انّو صحيح،عملا بالآية الكريمه :

ـ"يَا أيُّهَا الّذِينَ آمَنُوا إنْ جَاءَكُمْ فَاسِقٌ بنَبَإ فَتَبَيَّنُوا أنْ تُصِيبُوا قَوْمًا بجَهَالَةٍ فَتُصْبحُوا عَلَى مَا فَعَلْتُمْ نَادِمِينَ"ـ

براستوس غاب من مارس حتّاش لآخر ماي على التدوين

رجع يكتب في اخر ماي ، كتب على حفلة مرسيل خليفه ، و كتب على حومتو القديمه ، و كتب على الفنان الماريكاني اللي جاهم بكري للدّار ، و من بين ما كتب ، القصيدة هاذي في مدونة مائة قصيد للحرية، جاووه ثلاثة تعاليق ، زوز منهم معقولين (يعني في صلب موضوع التدوينه ، القصيده ) و التعليق الثالث خارج عالموضوع ،فيه استفزاز ، اللي هو هاذا .

بجاه اللي خلقكم ، شكون يستفزّ في شكون هنا ؟؟

اعطيوني الصله ما بين التعليق هاذا و مابين القصيدة

كان ردّ براستوس عنيف برشه ، و كلات بعضها بيناتهم.

انا اندفعت و تدخّلت باش نخلّي تعليق نخاطب فيه عمروش مفادو انّو أي واحد كي تستفزّو بالطريقه هاذيكه (فول و كمّون و سلامه مرورية) يلزمو ينتظر ايّ ردّ ، و قتلو بالامارة اذا ما تحترمنيش ما نحترمكش ، عندي انا ما ثماش نصف احترام و ربع احترام ،يا نحترمك يا ما نحترمكش.

( يا عمروش إذا عندك التعليق مازال مسجّل في الايميل ، بربّي انشرو )

من بعد ، حذفتو و قلت ما نزيدش نصب الزيت عالنار.

هنا وين عمروش وقعتلو هلوسه و قالّو مخّو اللي مولى التعليق هو براستوس ماهوش جنّي ، و بالتالي نفس التهلويسه خلاتو يستنتج اللي ما فمّاش مدوّن اسمو جنّي ، ههههههه

و بالطبيعه ، فزع عمّك الكلندو ، و بدا يذيع في الحكايه، و ... يضحك...كيما العاده متاعو

التهلويسه تزامنت مع انفلوونزا الخنازير ، و تعدّات لجماعة الطابور ، اللي لا يزّي هوما من قبل متنوبزين من براستوس و ارتيكيلي وقت اللي قالولهم ما تصنّفوناش في قايمة اصدقاءكم و اشقّاءكم ما حاجتناش ، الله غالب ، ما حاجتهمش بيكم و بتصنيفكم ليه ، ناس بكري قالو : كل شي بالسيف الا الحب بالكيف ، و زيد ما عجبتهمش التدوينه هاذي . سينون شبيهم ما تذكّرو الحكاية كان مّخّر ـ يعني سوء النيّو واضح

ولاّو عاد نشّطو الذّاكرة متاعهم و رجعو للارشيف ، بكل نيّة فاسده ، ما تواتيش اخوات عفيفات متدينات تقيّالت ورعات كيفهم ، رغم انّو هالارشيف في الحقيقه ما يخصّهمش اساسا ، بل يخصّ براستوس و العمروش فقط ، و هبّطولنا هاك التدوينه الاستخباراتية التافهه متاع التشابه في رسم الهمزة ،هههههه

إذا انتوما جيتو البارح ، ولّيتو تكشفو في هاذا شكون و هاذاكه شكون ، من خلال رسم الهمزة ، انا نقوللكم : معايا انا لا ، و من فضلكم الزمو حدودكم

ايّه اش قلتو يا مفتّشات اخر زمان ؟؟؟ باش تجيو بحذايا و الا لا ؟ رغم انّكم كان تجيو ممكن تعملولي مشيكلة مع المادام هههه، اما ميسالش من أجل الحئيـــئه ، كلّ شي يهون

انّستو

هالمرّه ... منعت من مقصّ عميرات

2009-07-03T00:32:00.000-07:00

احنا فين .. و هوما فين

2009-06-12T04:07:00.000-07:00

باللاهي البارح نصّ الليل نتفرّج في اخبار الجزيرة ، عاملين تحقيق كامل على الاخوة المدونين في المغرب الاقصى كيفاش عندهم تاثير كبير في الحركه الاعلامية و الثقافية و وزنهم ثقيل و فاعل .، خاصة في الفترة هاذيّ .، فترة انتخابات بلدية في المغرب، و كيفاش هوما يمثّلو رقيب جديد لعملية سير الانتخابات في جوّ من المصداقية و الشفافية ،و يدورو على المراكز و يراقبو في الامور التقنية و يسجّلو في الهفوات، و حكى بعضهم في العلن و موش في الخفاء ، على دورهم و وزنهم اللي ماشي و يكبر في الساحة الاعلامية و الثقافية يعطيهم الصّحّه،هاو التدوين و الا بلاش ،موش كيفنا ، مازلنا انّاقشو في مواضيع متاع ترف فكري يعني اللي يتصفّح مدوناتنا ، يقول صحّه ليهم المدونين التوانسه ، ماعندهمش مشاكل في بلادهم يحكيو عليها.. اهوكم يتناقشو على السيده عايشة ، و كل واحد يخوّن في لاخر و مصنّفو في طابور ، وعل ذكريات الطفوله ، و على مصافحة الانثى تنقض الوضوء و الا لا ، و على تجارب ناس اخرين بعاد علينا حتى جغرافيا
اللي بيه الفايده ،اهوكم جماعة التلفزة سحبوا البساط ، و ولات مشاكلنا اتّاجر بيها صحافة البودورو و اعلام الكواغذ و يزايدو علينا بيها

حمّى المــــركاتو .. حمّى علوش العيد

2009-06-10T01:21:00.000-07:00

كنت في سابع نومه

فيّقتني حمّى المــركاتو بنهاية الموسم الرياضي اللي قالو عليه موسم قوي و كبير و القاب و تيتروات ، و حتى البطوله يقواو هاي قويه ، و لولى في العرب ، اللي ما عندهم حتّى تصنيف اوّل في حتى شى

مــركاتو

شرا ، باع .،مليار ، زوز ،هوكه جا

.،هوكه اختبروه ،هوكه تستاووه ، هوكه خطفوه ،هوكه "شدّوه" ، و تبدا عاد الاشاعات ـ راو احسن هدّاف ، مركا عشرين ـ خمسين في الموسم الفارط ،وعصفور نادر ،و هات من هاك اللوغه القزوردي ، اللي متسلّفينها من الشــّعب و يبدا الموسم و ما تلقى شي، و تولّي الناس و الجمعيات الكل تبرّر في هزايمها و اخفاقاتها الوطنية و الدوليه بالرصيد البشري الضعيف و التحكيم، و رانا مستهدفين ، و يكمبنو علينا، و كل شي ضدّنا

الحكاية الكل فكّرتني بحمّى علّوش العيد بقرونو ، نطّاح ، راعي في الكليل ، بلدي ، غربي ، بالليّه ، و من بعد ، ما يبات كان في كروشنا ، و يزيد يصعقنا بنسبة كبيرة متاع كوليستيرول ، و اللي نصرفوه دوايات ، ما يشريلنا قطيع كامل

عمروش باش يعملّي دروس محو امّيه ... يحبّ يزيد على ما بيّ ههههههه

2009-03-06T14:37:00.000-08:00

حدّث عمروش قال

وقلوا (عليّ انا)راو عندي شكون لاهي ببرنامج تعليم الكبار(سمعت بيه ماكملش قرايتو غاضني وزيد العلم نور)قلو يبعثلي مطلب وصورة ونسخة من السيرة الذاتية وبحول الله ندخلوه لدروس محو الامية (يجعلو للربي )عرض جدي راو

و حدّث الجنّي قال

إذا انا ما اتيحتليش الظروف باش نتعلم .فموش ذنبي . لكن ذنب إعاقتي اللي حكيت عليها في اول تدوينه ليّ بكل شجاعة ، فانّي ثقفت روحي بروحي من الدنيا و التجارب و الاصحاب و المدونات و التبربيش في كل شي ،و ولّيت نفكّر بطريقة تقدّمية برشه

اش عملت انت بتعليمك و شهاداتك ، والحال انك تفكّر بنفس طريقة جدّايتك

بخار انفاسو .. و التوافــه

2009-03-06T04:00:00.000-08:00

بربّي هاللبخار انفاسو شنيّه ...؟؟؟ ياخي بالرسمي مصري ؟؟؟... انا مانيش مصدّق انّو مصري

و هاو مثلا نص تدوينتو اللي قبل لخّرانيّة .. كيفاش فيه برشه "اغلاط" حسب اللهجة المصرية السائده

ســــــــــــــــــــــــــــــــــــــــــلام
طيب يا صاحبي مش كنت تقول من الأول كان تحبو تتضامنو بالحق وتحكيو برواحكم راكم تضامنتوا مع هاك الولية مسكينة مهبلها هاك المهبول وهي تحارب فيه وحدها وانتوما تتفرجوا وهو يبعثلكم في الايميلات؟علاش كيف شكيتو ان وقع تهديدها من اسلامي هبيتو يد وحدة وكلكم نددتوا بالي صار وطلبتو منها باش ترجع وتو كيف الشيء على عينيكم كل واحد مطفى الضوء ولا فمة شكون يمشيلو ويقرالو ويصوت عليه هههه وينكم تره؟عشان خاطرك اهو (يا بطل)... فسخت الكل التدوينات القديمة... و انتظر مني فسخ المدونة و حساب الجي مايل تماماالمرة اللي فاتت، لما وقع تهديدها من اسلامي، هبوا كلهم عشان كان فيه صدق في مشاعرهمأنا كمان كنت واحد من اللي هبوا، و انتم عارفين انا عملت ايه في الواد الإسلامي دهالمسكين، جاتو في مقتل... و المساكين الثانيين اللي هو انتو، شربتوهاو كل ده و أنا و هي عمالين نضحك من غباوتكم شربتوها ازايبس دلوقتي، الكل عرفها... و عرف طينتهاو المسألة في الأول و في الآخر... شخصية، بيني و بينها، ايه اللي حشرهمقبل ما اختم... و عشان الإعتراف بالحق فضيلة زي ما بيقولوا
لم يقم تيتوف بقرصنتي
كان مقلبا مني ردا على التهديد "الإسلامي" الذي تعرضت له تلك الوليّةو كانت على علم... و كان غيرها على علم... و شرب غيرهم الطعم... من أسمتهم بالأغبياءعارف ليه ما فيش ولا واحد اتدخل المرة ديه... عشان همّا عرفوا حقيقتها.خلاص... اللهم إني قد بلّغت... اللهم فاشهدتحياتي إلى:إليك انت، عمروش... الاول و الأخيرالواد الأمور الحليوة... هو انت عجبتك الحكاية و إلا ايه... طب ياعم، مافيش غيرك فاهمني و آسف على كل إزعاج كنت طرف فيه... بس انت عارف و انا عارفالست، مش ح أسميها، بس هي عارفة نفسيها... اللي راحت مدياها زغرودة لما كشفت امامها الحقيقةاللي سمتكم و قالت عنكم انكم اغبياء... أصل الحكاية كانت محبوكة قوي و كان من الطبيعي إنها تخيل عليكمالواد إياه... بتاع البقرة، مسكين و الله، بس انت كمان حليوة (و ماظنش انو شعرك مسبسب زي الأولاني) و يجي منكخلاص... و قبل ما أروح في ستين دهية زي ما هي عايزةاعترافكنت انا جمال البخاري... أنا اللي عمري ما حبيت... حبيب محبوب... حبيب بوحاجبي (هههههه)... شلبيةلم اكن غيرهم... لا زياد المولهي و لا عبدو و لا فلسفة و لا سفسطة و لا اي حد من دول خالصو لم اترك يوما تعليقا مجهول الهوية... الهويات كتير و الحمد للهو ما حدش يفتح فمو و يقول اني كده او كده عشان لو حد فتح فمو... حافتح فمي انا كمان و ح اقول على كل اللي اعرفو... و ده مش كويّس عشانهاو عشان التانييناعتراف آخر و أخيرانسحابي لم يكن أخذا بخاطرك انت عمروش، أنت لا تساوي بنظري ريالة، لا لشي، سوى أنه قد كنت انت الذي اخبرت صديقك عاشور الناجي عبر صفحات الفايس بوك أني انا هو زياد المولهي... كشفتني يا راجل، روح جاتك نيلة... ههههههههههانسحابي في واقع الامر... كان أخذا بخاطر الواد إياه، و بسوداع... كان نفسي يبقى بالقبلات، بس مافيش داعي
Posted in: حب...وداع, نهاية...سلام

المصاروة غالبا ما يقولوش لما وقع تهديدها ، الاقرب للهجة متاعهم هي : لما تمّ تهديدها
موش و انتم عارفين ، الاصحّ :و انتو عارفين َ
موش غباوتكم ، الاصح :غباوتكو
المرّه ديّه .. المرّه دي و تتنطق المرّادي
عارفة نفسيها .. عارفة نفسـَََها .. مع التركيز على السَّ
نفسيها تتقال للجمع مثلا انتو عارفين نفسيكو
قالت عنكم انكم اغبياء و قالت عنكو اغبيا ، و الا قالت عنكو انّكو اغبيا

و ما حدّش يفتح بؤّوا .. موش فمّو

علما و انّها المسألة تافهة برشه ..و ما ينجّمو يكونو فاعلين فيها كان التوافه .. مع احترامي للبعض ممن كانوا ضحية لمثل هالتفاهات

على فكرة

لاحظتوشي حاجة ... كل قربلّه تافهة .. يكون تيتوف احد ابطالها

الملايكة الجدد : تيتوفـئيـــــل .. عمروشــئيـــــل..بوالعربيـئـــــيل

2009-03-01T03:05:00.000-08:00

قالّك يا سيدي يا بن سيدي .. ثمّة مدوّن اسمو براستوس .. جاه هاتف .. موش جوّال والا فيكس ... ههههه ... لا،لا هاتف هاك اللي يجي في المنام ، حاجة تشبّه للوحي ، و قالّو قوم توّه امشي لتيتوف سمّعو الكلام ، و امشي توّا لابو عربي سمّعو الكلام..هكاكه ، لا طاح لا دزّوه ، يمشيش في بالكم اللي الجماعة هوما اللي مشاوولو لمدونتو ، و بداو يسيّبو عليه في الرّيق

لا لا ، تي راهو كيما قلتلكم جاه هاتف ،و عطاه اوامر .. ما يلزموش يناقشهاعمّك براستوس ، قام مرعوب من هاك الهاتف اللي جاه . ومشى لمدّنتو . و بدا يسمّع في هالملايكه . الابرياء .. الاتقياء .. السمحين .. الورعين .. العاقلين . المتربّين . المتحضّرين . المتثقفين . الحكيمين . الحيارى . المظلومين . عالصّبر موش آدرين . و بدا يسمّع فيهم في الكلام

يخلي دار الهمّ

يزّيو من الكذب . يزّيو من النفاق . يزّيو من التمسكين.و الكلام باسم الدين.و لبسان الماسك متاع اولياء الله الصالحين وانتوما .ما تنجّمو تكونو كان اهمّ مكوّني هالزباله اللى وحلنا فيها

بربّي شوفو هالمثل البسيط .اللي نّجّم نجبدلكم منّو عشرات على التبلــّي و طلبان الشبوك و الاستفزاز

هاذي باج بيغ تراب في الفايس بوك

يفدلك هو و اصحابو على النوع الجديد متاع البيرة

يجي عمّك تيتوف شهر مسيلمة الكذّاب ، يدخّل خشمو بيناتهم و يقوللهم : "همّال" ، و "متاع كحول"، اش ما همّو فيهم ؟؟؟ شكون جبدو ؟؟ شكون حكى عليه ؟؟شكون جاه لدارو

يا ولادي فيقو . يزّي من التمثيل علينا بالاخلاق و البراءة و التربية و الاخلاق

يزّي من الكيل بمكيالين

اكثرشي من الدليل هاذا على انّو مسيلمة الكذّاب هو اللي يتبلّى عالعباد؟؟؟؟خلّي عاد من القايد لاخر ، عمروشئيل اللي يغمّض عين و يحلّ عين

يغمّضها على القباحة المشتّلة المزخرفة المزركشة هنا

و من بعد يمشي يتمسكن و يعمللنا فيها شيخ فاضل..يزّي من النفاق و الرّياء

شوفو التعليق القبل الاخير هنا ، و اللي فيه اعتراف صريح بلّي ابو العربي هو اللي بدى بالاستفزاز و البذائة ، و هوّ اللي بدى بلوغة الخيشه ، وما نفاش التهمة على روحوا ، لكن يطالب بردّ فعل اقل حدة من هكاكه

هههههههه

يا والله احوال

قالّو : 'كنت تنجم ترد بلوغة حرشة لكن موش بذيئة' ههههه ... قالّو "حاشاكم"تمسح بشوليقة في التوالات ، و يحبّو يجاوبو بلوغة "رطبه" ههههههه.. يا خي بعقلو السيد هاذا و الا بلاش ؟؟؟؟ه

انا من المعجبين ياسر بمدونة براستوس ، و من المتابعين ليها ، رغم انّي ما نتوافقش معاه في كل افكارو ، باش ما تدخّلوليش فيها لوغة التحالفات و ما التحالفت و استقطاب و ما نعرف شنوّى

و لوغتو العادية نظيفة . و نقدو للدين ما يتهكّمش .رغم اللي كيما قلت ما نتوافقش معاه في كلّ شي

ياخي نسيتو اش عمل فيه قاسم بالسيناريوات و التدوينات المستفزة ؟؟؟ على حكاية الفطير متاع برباش ؟؟ قالّوشي حاجة؟؟؟

ياخي ديمه هوّ؟؟

و الا الحرب اللي شانّينها على عياش .اللي يقرّيهم في الفلسفة و في الدنيا الكل

ت انا ما حالفنيش الحظ باش نواصل قرايتي . كي ندخل لمدوّنتو .نتثقف و نتعلم و نتكون .و نستفاد

تماو هو ما يمّنش بربّي وو يمّن بفكرة التطور . ناقشو . ورّيه بالادلة العلمية اللي هو غالط

نهار الكل و انتومت تتمسكنو و تتسكبنو

*******

و على الاساس هاذا ، اساس براءة الجميّعة هاذومه من البذاءة و القباحة و الا التطبيل ليها ، و الا جبدان الناس و جرّهم ليها ، وقع انتدابهم . لفوق ... لفوق لفوووووووووق . كملايكة جدد.مع عزرائيل و ميكائيل .. واحد اسمو تيتوفئيل..و لاخر عمروشئيل . و لاخر ابوعربيئيل . و القايمة قد تطول

و توّا نخلّيكم مع التصاور اللي مازالو كي وصلوني من غادي .....ههههههه

الملاك الصغير

تيتـــوفـئـيـــــــــل

هههههههههه

و بالإيحاءات

ههههههههههههههههههههههههه

وان عدتم ... عدنا

مؤامرة كــُــرَويـّه

2009-02-23T04:16:00.000-08:00

بالله شبيه كل ما يقرب الموسم على نهايتو و تقوى المنافسة على اللقب ، و بعد ما نبداو نفرحو و نشمّو في ريحة تعددية و اختلاف الوان في الكورة عالاقل ، و يوفى عصر الحزب الوا ... أأا .. لا .. لا.. نقصد عصر الفريق الواحد، اللي يحب يكون مهيمن و مسيطر من البداية للنهاية و بكل الاساليب ، شرعية و لا شرعية ، يطلع لنا رئيس جمعية بتصريح غريب ، مبطّن ، مثل تصريح السيد بادين التلمساني البارح ، اللي يحب يرجع بينا لنظرية "المؤامرة" والاستهداف ، و كان تتذكّرو ، و في نفس الفترة من الموسم الفارط ، طلع لنا سي معز ادريس و يحكي بنفس اللغة لغة الاستهداف و المؤامرة
بربّي آنا مؤامرة ؟ و شكون يتآمر و الا يستهدف في اشكون ؟؟ و هوما يعرفو اللي تأثيرهم في الرأي العام اكثر و اسهل من خطاب طويل متاع شخصية سياسية .
يزّينا من التصريحات الاعتباطية و اللامسؤولة رانا ماناش ناقصين شوشرات ديماغوجية ، و خلّينا نلعبو الكورة للكورة بدون اصطناع مؤامرات و معارك وهمية ، واللي يتخاذل يتحمّل مسؤوليتو ، و ما يلقيهاش على متآمرين من صنع خيالو و اللي يربح صحّه ليه

الى عاشور الناجي

2009-02-19T11:03:00.000-08:00

انا الجنّي .. مدوّن بسيط .. مانيش اكاديمي و مانيش مختصّ في السياسة .. و هاذا ما يمنعنيش من الادلاء بآرائي طالما اني التزم الاحترام و اطالب به
حبيت نسوق جملة من الملاحظات الى المدوّن عاشور الناجي اللي عندي مدة نتابع فيه . لكن ما نجّمتش نحطّو في خانه معينه ، موش خانة متاع تصنيف سلبي و طوابير .. لا .. ابدا .. اما حبيت نعرف انت شكون ؟ و انت وين من قضايانا

على خاطر انا عرفت مدونين اسلاميين .. واضحين .. و يساريين .. و عروبيين .. ليبراليين .. و مستقلين لكنّهم يشتركو مع هاذا و الا هاذاكه في بعض النقاط

كل المدونين تقريبا يكتبو في مختلف المواضيع

كل المدوّنين كيما يطّرّقوا لفلسطين و الحرب ..يطّرقوا زادا لقضايانا الوطنية .. و ينقدو و يعبّروا على استياءهم من السياسات و البرامج المتبعة

الا انت .. فقط هاو فاش لاحظتك تحبّ تحكي ، و بشكل مطّرد ياسر و منتظم وكثيف

انا لاحظت انك في اغلب تدويناتك يا إمّا تبرّإ في إسرائيل من الجرايم ، سواء ارتكبتها: اعتداءات غزة ، أو لم ترتكبها .. هي او اسلافها "اليهود" : مقتل الحسين.. رغم انّا ما نّجّموش نجزمو بذلك
و في المقابل لاحظت انّك هالتبريء اللي انت تمارس فيه ديمه لاسرائيل ديمه ترفقو بتضخيم ليها و بتلميع و تثمين لديمقراطيتها و حداثتها و تفوّقها .. في حين انها اسوأ نموذج متاع تطرف و تعصّب
لاحظت كذلك انّو هالتمجيد اللي ديمه يشعّ من تدويناتك لاسرائيل يكون زادا مرفق بتقزيم و تشويه و سخرية من أيّة حركة مقاومه ، او تضامن مع هالمقاومة

ياخي ، و سامحني على صيغة السؤال التحقيقية شويّه هههه انت شكون ؟؟ انت شنوّة ؟؟؟

لا ... لا ... للتصنيف ، لا .. لا .. للتصنيف

2009-02-17T09:57:00.000-08:00

بعض ملاحظات حول التصنيف ، و اسمحولي اذا كنت متأخّر خاطر الظروف ماهيش سامحتلي انّي نكون كونّكتي كل يوم

انا كي نفحت في ميدان التدوين .. شفت فيه هامش متاع تعبير حرّ .. تلقائي .. حبيت نهرب من الحاجات اللي تمارس فيهم السلطة عالعباد اللي عندهم تفكير موش كيفها هيّ .. و اللي يعرف مدوّنتي لولى ، اللي حجبها عمّار بعد ما صنّفها ما نعرفش على آنا اساس ، يفهم مليح انّي حبيت نفضفض .. باش نرتاح شويّ من حاجات تبكبك لداخل ، و كي نقولها نتعرّض للاحكام المسبقه .. و جيت هارب من العباد اللي تصنّف فيّ ، ياخي لقيت ما اكثر ، خاصة المدة الخّره ، تصنيف المدونات الى غبية و حمقاء ، شيء مؤسف ، ياخي انت شكون باش تصنّف العباد ، شنيّ مشروعيتك ؟ شنيّ احقّيتك ؟ عندك مفتاحخ سحري متاع الذّكاء باش تصنّف هاذا غبي و هاذا لا ؟؟ تقلّي هاو ثمّه شكون يطلق على الفكر المقابل ليه صفة الغباء ، و هاو ثمّة حتّى شكون مسمّي مدوّنتو لا للغباء ، معقول لكن ثمّة فرق بين نعت "فكر" بالغباء و بين نعت "شخص" بالغباء دون احترام لكرامتو الانسانية ، وشخص هنا يعني مدوّن

مّاله انا انّجم نعمل ليسته في المدوّنات النّسا ، و نحطّهم تحت عنوان "مدونات ناقصات عقل و دين" ؟؟ مادام كل واحد حرّ في اختيار المقياس اللي يريّحو
و تحتها ليسته اخرى متاع "مدوّنون سوكارجية" و تحتها ليسته متاع " مدوّنون زنادقة" و تحتها"مدونون مشعوذون" و تحتها" مدونون سمان" و تحتها "مدوّنون طوال" و تحتها مدوّنون ضعاف" و الليستات ما توفاش

ياخي و انت مصنّفني بالشكل هاذاكه ، مازالش يجي منّو نجيك و نزورك و انّاقشك و انعلّق عندك ؟؟؟ اكيد لا ، لانّك سايّي حكمت عليّ مسبقا ، يعني هاذا باب متاع حوار سكّرناه بها التصنيف السلبي هاذا

عيب !!! و الله عيب

راهو كل مدوّن عندو مدوّنين يكرههم ، يقوم يصنّفهم هكّه ؟؟؟؟؟ !!!!!؟؟؟؟؟

نفرضو كل مدوّن يعمل هكّه ، لاش نوصلو فلــّـخـّـر ؟؟ نوصلو باش كل مدوّن يكتب تدوينه يعلّق عليها هوّ و يمشي يرقد ، مادام اللي ممكن يتفاعلو معاه ، مقاطعينو خاطر مصنّفهم ، و الا مصنّف اصحابهم ، اللي هوما مصنّفين اصحاب اللي موش مصنّف اللي مصنّفهم هوّ، على اساس انّهم يتصنّفو ، لكن تصنيفو ليهم ماكانش كيما التصنيف اللي صنّفوه بيه اللي مصنّفينو قبل ما يصنّفهم هوّ

ريتو مخيبها الحكايه ؟؟؟ هههههه

لا ، و خاصة انّو العديد من اللي تمّ تصنيفهم هوما طاقات محترمه ، سواء من الليستة الفوقانية و الا اللوطانية ، و كيما طارق الكحلاوي مدونتو محترمة و مواكبة و مطّلعه رغم انّو يصعّبها علينا مرّات هههه (نمزح) والا براستوس الفنان صاحب المدونه الطريفة ، و فري راس اللي يقعد يقعد و يبعثلنا نقشه مختصرة وحلوّة ، و قصّة اونلاين اللي لمّها أدب و قصة قصيرة و سنما و تاريخ القضية الفلسطينية.. ارابيكا .. و لادة ..و غيرهم من الاصدقاء

كيما هاذوما ، كيما زاده ازواو اللي مدوّنتو ما تنجّم كان تجلبلو الاحترام ، و هي مدونه متعددة الاهتمامات ، و غنية و ثريّة ، و الا عياش اللي تدويناتو انا واحد من الناس نستفيد منها في مختلف المجالات : فلسفة ، علوم ، فنون ... مانيش بالضرورة موافقو على كل أفكارو الكلّ ، اما ما ننكرش انّو يضيف لكل من يقرالو ، و الا بيغ صاحب الاسلوب المتميّز

انا تبّعت حتّى ردود الفعل ، صحيح كانت متشنّجة و منفعلة لدرجة البذاءة ، و هاذا زاده مؤسف جدا ، لكن ّ من الشرعي انّو اللي يستفزّوه في شخصو ، مآلو يردّ الفعل

و نستغرب اللي يستنكرو البذاءه ، و نرى اللي ما عندهمش الحق في هالاستنكار ، على خاطر هكّاكه عاد كل حدّ و طريقتو

اسبانيا .. جرائم الحرب .. تيسير علوني

2009-01-30T05:17:00.000-08:00

وانا نتابع في الخبر اللي مفادو محكمة اسبانية تنظر في قضية تورط قادة اسرائيليين (هنا) في جرائم حرب .. جا لبالي

تيسير علوني

اللي يقبع في السجون الاسبانية منذ اكثر من ثلاث سنوات

مفارفات

WANTED ... قتلة أطفال ... مجرمي حرب

2009-01-28T02:59:00.000-08:00

اطالب

مع قصة ... براستوس ... بالملوان ..عمروش ... ولادة

و غيرهم

بإحالة هؤلاء

البادية صورهم اسفله

على المحاكم العالمية

بتهمة جرائم الحرب

اللتي ارتكبوها في حق مدنيي غزة

حرزي حاليفي herzy halevy آمر لواء المظليين

ايقال سلوفيك ygal slovik آمر لواء 401 للمدرعات

ايلان مالكه ilan malka آمر لواء المشاة

انـّـــستو

2009-01-07T10:13:00.000-08:00

جـــائزة نـــوبل

للـســّــــلام

عسلامتكم من جديد

2008-11-28T13:10:00.000-08:00

مرحبا بالجميع

اللي تذكّروني .. و الي نساوني

اهلا بالجميع

دكاترة و شعبييـــن

اهلا بالجميع

اللي سأل عليّ و اللي ما سألش

اهلا بالجميع

اللي نحّالي اسمي من قايمتو و اللي ما نحّاهش

توحشتكم برشه .. و المدة اللي فاتت منعتني عدة ظروف .. يطول شرحها ، من التواجد بيناتكم

هاذي طلّه خفيفه .. حبيت من خلالها نقوللكم انّي مازلت حيّ

و نشاله نتقابلو في ساعه سعيده

التوزيـــع الجهـــــوي... للبــــاكالوريا

2008-06-27T11:36:00.000-07:00

يظهرلي القايمه هاذي

رغم انها ما عندهاش علاقه مباشرة بالتنميه الشامله و التوازن الاجتماعي و الاقتصادي بين الجهات

.. الا انو كيف نجرّدوها

و نعزلوها على الاطار البودوروي اللي وردت فيه

فانّها ناطقة مليح ..

مليح ... ـ

ملـيـيـيـيـيـيح..ـ

الكلب هو اللي نبح نبح : خرّجوني من تن بلوغ .. ورجع وحدو

2008-06-26T13:56:00.000-07:00

شي مؤسف و مثير للشفقه .. و للضحك ... حالة العجز على التفكير .. و العجز على الاقناع .. و العحز على الفهم و على المحاججة ...اللي مرّات يوصللها الواحد

صحيح انّي تورّطت في بعض المشاحنات و الاستفزازات بسبب مجاراتي لمستويات هابطه .. ساهم دخولها لفضاءنا التدويني في اثارة بلابل زايده .. جعجعة بلا طحين ..قلّة حيا و قلّة احترام لمن يفوقوننا سنا و تجربه و علما و ثقافة و فنا و دكاء و طرافة

تابعت الكثير من الحوارات بين مدونين مختلفين في الافكار .. لكن يتحلّاو بمستوى كبير و ناضج من النقاش الهادئ المفيد اللي هو ارقى من الاوصاف الاخلاقية التافهة كتفاهة اصحابها .. اللي ما نعرفش منين قاعدين يجيبو في جمل السب و الميوعة اللي يأثثوا بيها في مدوناتهم .. في حين انهم وقت اللي وقعت دعوتهم في رديون .. كانوا "صم بكم لا يفقهون" .. و كيما يقول عم منصور جارنا : زكرم بكرم

الكلب الذي تصف به الناس .. انبل منك و اشرف منك و اصدق منك و أوفى منك

ملّا بوباله وحلت فيها

قول لأمـّك تعلـّمك انـّك ما عادش تحذف التعاليق

2008-06-18T15:03:00.000-07:00

التعليق عدد 4 المحذوف في التدوينه هاذي... هو الآتي :ـ

:
و انا آش نقول لعمـّــتي وقت اللي تقرا الكلام البذيء هاذا اللي كتبو تيتوف

http://antibhema.blogspot.com/2008/06/blog-post_12.html

انتهى التعليق

بربـّي أشفيه ما يتحذف ؟؟؟؟؟

علاش التعليق هاذا يتحذف ...؟؟؟؟ يا جماعة 15 جوان .. و أنصاركم من البهائميين..العمائميين ... اللي بعمرهم ما

كانو ملائكيين . حمائميين

البند الاوّل : ما تصافحوش الرجال

2008-06-16T09:14:00.000-07:00

استدعاني نسيبي للعشاء في دارهم .. قبلت الدعوه و قلت الواحد يمشي يبدّل الجو .. مع ناس اخرين .. وجوه اخرين .. حديث جديد .. المهم تكسير روتين خفيف و برّة... السلام... السّلام... مرحبا .. مرحبا .. و بيك يعيشك .. زارتنا البركه .. تفضّلو .. عسّلامه .. ..........يد من الأيدين ما تمدّتليش كي مدّيت ايدي باش نسلّم على مولاتها .. ... يااااا ... مابلدني .. مسكينه عندها إعاقة و انا مادد كسرتي حاشاكم من غير ما ننتبه ... لا ... موش معقول ... ت شبيها سلّمت على المادامه ... ماهيش معاقه ... شنيّ الحكايه ... والله لا بيني و بينها شي .. باهيشي .. ما حبّتش تسلّم عليّ ..آنا بالذات ؟؟؟حلوّاشي ؟؟؟؟ علاش ؟؟؟؟؟ ـ

ما نخبيش عليكم .. عرقت و حمرت و خضرت ..... و مشيت شديت بلاصتي و قعدت نهضّم في اللي جرالي .. و نلعن في هالضيافه ... و من غير ما نوصفلكم... حالة واحد تعرّض لموقف كيف هكّه في دار الناس

انا هكاكه .. و جا بحذايا نسيبي اللي انتبه للمظلمه اللي صارت عليّ و حبّ يلطّف منها و قالّي : ما تحط شي في بالك .. هاذيكه راهي قريبتنا تخدم أعاره في السعوديّه و جات فاكانص ... و متديّنه

ياليتو ما برّرلي الحكايه

يا ليتو خلّاني هكاكه .. راني قلت : ما عجبتهاش فاطشتي .. دونك ما سلّمتش عليّ ... هي حرّه

إعاره ؟؟؟؟؟ زعمه الكنتراتو متاع العمل اللي عملاتو مع السعوديين ينص على انّو الرجال و الزمان مافيهمش امان و ما يلزمش نسّلّمو عليهم

اش ما دخّل الاعاره في انّها تحطني في الموقف هاذاكه

زعمه فمّه بند في الكنتراتو ..يقول انّهم الرجال ديمه خباث...و ... على اللمسه ...........................ـ

يا رسول الله .... يا رسول الله .

زعمه قدّاش من ضحيّه قبلي جرالهم معاها ما جرالي .. ؟؟؟؟

متديّنه ؟؟؟؟؟؟؟؟ ياخي رسولنا موش قال و إذا حييتم بتحية فردّوها او ردّوا بأحسن منها ؟؟؟؟؟والا حاجه كيف هكّه

و مبعد ... قعدت نحمد في ربّي و قلت جاب ربّي ماهيش عواشر و اعياد .. لتالي راني مدّيت خليقتي باش نعيّد و نبوس ...و راهو تقام عليّ الحد لاني مسيت شرف القبيله الكل

بربّي نحب نوجه دعوه ليها و لأمثالها باش كيف تبدا عندكم ضيفان .. و انتوما ما تحبّوش اشكون يمسّكم .. تقولش عليكم كان انتوما عندكم ما يتمس .. اكتبو أردوازه ...عرفتوها الأردوازه ؟؟؟ لـَــوْحـَـه .. هاك اللي يقراو فيها تلامذة الابتدائي .. و اكتبو فيها الطباشير : ممنوع اللمس .... والا ... بلاش تبوسني في عنيّ ..و آقفو بعييييد و أرفعوا الألواح ...يظهرلي هكّه خير من تمرميد الناس

الجـّـنـّـــي يفضح التـّــجـنـّي

2008-06-15T07:12:00.000-07:00

التدوينه هاذي كانت هي التعليق المحذوف هنا...و ما كانش في الحساب ننشرها كتدوينه لولا انّو هو حذف التعليق .. و انا كنت متوقّع انّو باش يحذفو .. و نبّهتو انّو اذا يحذف التعليق ننشرو في تدوينه .. و هاو انا كنت عند كلمتي:ـ

يا غفّاص .. انا باش نبيّنلك اللي انت بنشرك لهالحوار عملت إدانه لروحك

أولا..الحوار داير بينك و بين شخص اسمو" آنا هوّ" ... و اشكون قال اللي هو براسطوس

ثانيا .. انت ظهّرت انك تبربش في العباد بطريقه متاع بوليسيّه .. و هوما مطفّينك .. ريت كيفاش وقت انت قتلو على البنيّه اللي قتلوها في الرديف ، و اللي هو ظهر خبر موش صحيح و لا من حكى عليه غيرك انت ، قالّك يا انشر الخبر في مدوّنتك يا اسكت

بربّي ما حمارش وجهك كي قالّك : مّاله اسكت

ثالثا .. هو مبيّن انّو عايش حياتو بوضوح

و موش يعمل في الحاجات بالسرقة

يعني

يشرب..c'est يشرب

موش كيفك انت عامل فيها صحابي جليل و انت تشاتي باسم بنيّه...هههههههههه

رابعا.. انت استشهدت بهالحوار باش تبيّنالتسامح متاعك... لكن ظهر هو متسامح اكثر منك .. على خاطر هو برغم اختياراتو الفكرية اللادينية .. اللي هو حرّ فيها ..عبّر على انفتاحو و احترامو للتفكير الشيعي ..

في حين انت كل من يخالفك الرأي من حينك تطلق عليه لقب كافر

خامسا .. يبدو من خلال الحوار انّك كنت ضيف ثقيل الظل عليه .. لانّو انت تتكلّم اكثر و هو ساعه ساعه يرميلك كليمه مجامله فيك .. امّا وقت اللي ماعادش متحمّلك بادر هوّ و قالّك هو لولاني : باي

تشعـف ؟؟؟؟؟؟ يا تفتوفة التفاتف ؟؟؟؟... هههههههه

لا عاد .. توّ ولّى عندك اسم جديد

تشعـف؟؟؟؟ يا مسيلمه الكذّاب ؟؟؟؟ههههههه

يا تيتوف .. انت راك في الزبــّاله اللي نكركر فيها

2008-06-14T14:46:00.000-07:00

انا مانيش زبّاله ... امّا نكركر في زبّاله

ههههههههههه

و الزّبّاله اللي نكركر فيها ... فيها ...من بين مافيها

ههههههههه

فيها تيتوف النبـّار ...يخوّف فينا من النــّــار

ههههههههه

تيتوف مسيلمه الكذّاب .. يخوّف فينا من العذاب

ههههههههه

تيتوف القبيح ... قايد حملة ضد التجريح

ههههههههه

تيتوف البزناس ... يكـفـّــر في الناس

ههههههههه

*********************

تحبّ نزيدك ؟؟؟؟؟؟ـ

هههههههههههههههههه

ـ"انا مش كافر" ... اما مانيش مشارك غدوه في حملة الجّـماعه

2008-06-14T06:35:00.000-07:00

ما نيش باش نزيد حاجه كبيره على اللي قلتو في عنوان التدوينه

فقط حبيت نثبت للجماعه اللي الحكايه بعمرها ما كانت فيراج كفّاره يا هدّاره كيما يأكّد قايدهم

بينما هي حكاية اخرى

حكاية انّو ما ينجّمش تاقع حمله متاع دفاع على الدين الاسلامي يقودها واحد يستعمل الكلام البذيئ

و اللي ماهوش حتّى متاعو .. شوفو التعليق الحادي عشر في التدوينه هاذي

ثانيا .. ما نّجّمش نشارك في حملة كيف هاذي تحت قيادة واحد وصلت بيه الاستهانة و التفوريخ انّو يكتب كيما القرآن..و نهار الكل وهو يكفّر في الناس

.....

انا مسلم اب عن جد ... لكني نمقت هالقساوسه الجدد .. هالاوصياء على الدين

جاي.. ؟ لا ...؟ جاي.. ؟ لا ... جاي..؟ لا ....ـ

2008-06-14T04:38:00.000-07:00

قالك ياسيدي .. مسؤول كبييييييير زعمه باش يزور ولايه دخلانيّة .. ايّ سيدي .. ما نحكيلكمش على التحضيرات .. بما انّو الخوف يعلّم السبق.. البلايص اللي كانت ما تنبّتش الهندي .. نبّتت القازون .. و حتى القازون بيدو مسكين .. استغفر الله .. من الخوف و الرعب .. من حينو رفرف ..
الطرقات المحفوره تعملت بالتابّي و الانرّوبي .. العلامات و الزينه .. و تخبية العيوب بالزنك المدهون .. و الديار اللي على الطريق الرئيسي دهنولها واجهتها بلاش .. مادامهم في خدمة الشعب ..
المسؤولين الكبار .. اللي كانو ما يخالطوش الرعاع .. تشوفلهم يدهكو و يلهطو و ذراعك يا علاف و عروقات شترلّه و جري و لهيط و الناس الكل ولّات سواسيه كاسنان المشط .. رئيس البلديه يحكي مع الدهّان و يستشير فيه في زيادة اللون الفولاني..الحق الحق .. جا لبالي يوم الحشر .. ماو قالك تبدا الناس الكل مغصوره .. و ماعادش فيها غني و فقير و مسؤول و زوّالي
الزواوله .. وجوههم مستبشره و عندهم آمال كبيره في انها هالزيارة باش تتمخض عليها انجازات و مشاريع ...و...و تستنفع منها منطقتهم ..و المسهولين .. وجوههم مرعوبه .. خاطر هوما اللي في الواجهة .. و خاطرهم الكلهم بعمايلهم .. و سعدك يا فاعل الخير ..
هوما هكاكه ..و تتجيهم معلومه مفادها انّها هالزيارة تلغات
.........
دونك .. علاش تضييع الوقت في الخطب على التنميه و الاصلاحات و التضامن و ...و... ماهو كلّ ساعه نهدّدو منطقة معينه بزيارة .. تو تنهض بروحها شوي

الشاب التونسي لبّاس ؟؟ و الا لاباس؟؟؟ ـ

2008-06-14T04:34:00.000-07:00

كرايمي مكسّرة من هالحوارات اللي يعملو فيها بعض القنوات مع الشباب في اطار هالحملة متاع الشباب هو الحل .. و الا ندرا شنيّه ..
يحكيو مع بنيّة في قناة من قنواتنا البيدونه .. حنبعل .. لا تقيس بشرّ .. ههههههه ... البنيّه الحق فينو برشه .. و يظهر فيها من منطقة هاي هاي .. بم بم .. كيما عادتهم في الاستجوابات و الانترفيوات .. قالتلهم : اسّعه الشاب التونسي تحفون .. و يموت عالقعدات و الشيخات

بدون تعليق

و زادو حكاو مع شباب من الجاليه العربية في بلادنا .. بنيّه من سوريا .. قالتلهم .. اهمّ حاجه شدّت انتباهي في الشاب التونسي " انّو لــبــّــــاس

ما تنساوش الشذّه فوق الـ : "ب" ... خاطر هوّ لـبـّــاس صحيح .. امّا ماهوش لاباس

البوهالي .. العـــائد

2008-06-13T14:52:00.000-07:00

زعمه علاش ؟؟؟؟ ـ

واللهي انا لتوّ مْــرهْــوج و داخل بعضي

فجاة لقيت روحي ما نّجمش ندخل لمدوّنتي .. دنيتي .. عالمي .. بلادي .. حومتي .. دشرتي .. وطني .. على خاطر انا مدوّنتي بالنسبه ليّ حاجه مهمّه .. مهمّه برشة .. كيما حكيت في اوّل تدويناتي انّي المدوّنه عاونتني باش نتخلّض من برشه قلق عشتو في حياتي زايد باش نرجعلو... لكن ما نخجلش من ذكرو

امّا علاش

...

ياخي اش عملت ؟؟؟ـ

زعمه خاطر انا تحمّست مع أهل الرديف و شاركت الاصدقاء في حملة الاحتجاج و التدوينه الحمراء الغاضبة ؟؟؟؟ باهي .. هاو موش كان انا ...

زعمه خطأ تقني ؟؟؟؟ زعمه ناس اخرين ؟؟؟ دخلو للبلوغسفير جدد ؟؟؟؟ و عندهم مكتب متاع قرصنه ؟؟؟؟ و متاع حاجات اخرى ؟؟؟؟؟؟ سوف نرى

الله اعلم

نحب نشكر كل من افتقدني و كل من سأل عليّ .. و بالخصوص براستوس و عمروش و ارابيكا .. وباقي الاصدقاء